Turmush — Ысык-Көл облусунун Жети-Өгүз районуна караштуу Саруу айылынын тургуну Азамат Мажиков түшүм мол берүүчү карагат өстүрүп жаткандыгын билдирди.
«Карагат өстүрүү боюнча топтогон тажрыйбамды жергиликтүү элге бөлүшүп келе жатам. Учурда 10 гектардан ашуун аянтыбыз бар. Былтыркы жылы чет жерден көчөттөрдүн түрүн алып келип, жаз алды менен калемче кылып талаага отургузганбыз. Эми келерки жылы түшүм берүүгө даяр болду.
Кыргызстандын бардык аймактарынан буюртмалар келип жатат. Биз көчөттөрдү тангактап жөнөтүүдөбүз. Мыкты делген 9 түр көчөттү сыноо иретинде отургузганбыз. Натыйжада биз күткөндөн да мыкты болуп өсүп чыкты. Бир түбүнөн 8 килограммга чейин түшүм алууга болот. Кара баштыкчаларды жайып, алдына суу кетирип тамчылатып сугаруу ыкмасы менен өстүрдүк. Буюрса келерки жылы карагат өстүрүүчү аянтыбызды кеңейтүүнү пландап жатабыз. Көчөттөр 120 сомдон жогору сатылууда», - деди ал.
Айыл тургуну Азамат Мажиков 1 гектар жерге өстүрүлгөн карагаттан 1 миллион сомдон ашуун киреше алууга болорун кошумчалады.
