Turmush — 15-мартта Токмок шаарындагы ири дүкөндүн жанынан 2 аялдын чырынын улам 2 эркек мушташты. Бул тууралуу аймактык кабарчыга жергиликтүү тургундар билдиришти.
Ал эми Чүй облустук ички иштер башкы башкармалыгынын басма сөз кызматы билдиргендей, 15-мартта Токмок ШИИБге соода борбордун жанындагы сейил бакта орун алган бейбашчылык фактысы боюнча билдирүү түшкөн.
«Ошол эле күнү Токмок ШИИБге 1988-жылы туулган жаран Т.Ш. арыз менен кайрылган. Арыз белгиленген тартипте катталып, сотко чейинки текшерүү башталды.
Мындан тышкары 1973-жылы туулган С.А. да арыз менен кайрылган. Аталган факт дагы катталып, боюнча сотко чейинки текшерүү жүргүзүлүүдө.
Алдын ала текшерүү иштерин жүргүзүү учурунда Т.Ш. менен И.А. аттуу адамдардын ортосунда чыр-чатак чыккандыгы, мушташ учурунда бири-бирине жаракаттарын келтиришкени аныкталды. Ага Т.Ш. менен жубайы С.Н.нын жана И.А.нын апасы жаран С.А.нын чатагы себеп болгоон.
Т.Ш. менен С.Н. алган жаракаттарынан улам Токмок шаардык жалпы дарыгерлер практика борборунда дарыланууда. Ошол эле диагноз менен Токмок шаардык жалпы дарыгерлер практика борборуна кайрылган жаран С.А. медициналык жардамдан кийин Чүй облустук ооруканасында дарыланууда.
Учурда материал боюнча келтирилген дене жаракаттарынын мүнөзүн жана оордугун аныктоо үчүн тийиштүү соттук-медициналык экспертизалар дайындалды. Окуянын мүмкүн болгон күбөлөрү аныкталууда, ошондой эле окуянын башка жагдайлары текшерилүүдө», - деп айтылат милициянын билдирүүсүндө.
Сак болуңуз! Өзгөчө сезимтал адамдарга көрүүгө болбойт
