Turmush — Бүгүн, 19-мартта Талас облусунун ички иштер башкармалыгынын имаратынын алдында Орозо айт жана Нооруз майрамына карата гарнизондук саптык кароо болуп өттү. Бул тууралуу Талас ОИИБдин басма сөз кызматы кабарлады.
Маалыматка караганда, саптык кароого президенттин Талас облусундагы ыйгарым укуктуу өкүлү Эрмат Жумаев, Талас ОИИБдин башчысы Бактыбек Нарчаев, Талас шаарынын ички иштер бөлүмүнүн, Талас облустук ЖКККБнын, ИИМдин Атайын багыттагы полкунун Талас облусу боюнча Атайын операциялар отрядынын, ИИМдин Күзөт кызматынын Талас шаарындагы бөлүмүнүн башчылары жана өздүк курамы, ӨКМ, РЭС, саламаттыкты сактоо кызматы жана элдик кошуундар катышты. Ошондой эле аталган бөлүмдөрдүн кызматтык унаалары тартылды.
Башкармалыктын башчысы Бактыбек Нарчаев майрамдык иш-чараларды өткөрүүдө коомдук тартипти, жарандардын жана жол кыймылынын коопсуздугун камсыздоо, кылмыштуулуктун жана укук бузуулардын алдын алуу иштерин күчөтүүнү тапшырды. Өздүк курам арасында мыйзамдуулукту бузууга жол бербөө, кызматтык тартипти сактоону талап кылды.
Саптык кароонун жүрүшүндө кызматкерлердин майрам күндөрү коопсуздукту камсыздоодогу даярдыгы текшерилип, соңунда өздүк курам жана кызматтык автоунаалар саптык жүрүштөн өтүштү.
Алдыдагы майрам күндөрүндө Талас облусунун аймагында 300дөн ашуун милиция күчөтүлгөн тартипте иш алып барып, коомдук тартипти жана жол кыймылынын коопсуздугун көзөмөлгө алышат.